 |
| فاطمة كليين |
دْبالَج الصْداق في يَديها لَمْعات
غارت منهم نْوادَر التْبن لَمْدَهبة، وجْميع لَبْنات
راحت عروسة لخيمة نْسابها؛ بزغاريد وبالما زْهَر
لقاوها
بظلام الليل والمَسك؛ سْواد شعرها تْقارنو،
بياض وجهها يلمع؛ فيه يبان ضي القنديل وخيالو
سنان الجوهر وشفايف بَلْعمان، السْواك حْشم منها!
عَينيها كوحَل زيتون تسقي عْيون من شافها...
يَديها رَطبة رخيمة، الحنّة بهم فرحات
لغزالة من رجليها غارت وفي شْواري تغطّات
كان في بيتها سَرْجَم صغير؛
مع طريق السُّواقة تقابل، و تمّة الصابرة صلحات
من السَرْجَم كان يجي الغربي من الكُدْية، خْبار
الدُّوار،
سلام الغادي وجاي، الغاشي... وشُعْلة حب قديم وغُنَّايات
"غادي نبني ليك رياض الورد بالخزامى وشجرة اللوز تْواتي زينك"
قدّام السَرجَم ؛ من الغيرة بنى صور عااالي؛
عالي قطع حَس السُّواقة لي كان على الخاطر يفاجي...
دار العام، وقف التْبن في الفدّان وزرع المتْمورة
بان، والطُّلْبة قراوا القرآن
تَطْحن الزرع في الرْحى وخْمَر الشِّيار، سْخَن جْمَر
لِشَكْوة اللبن والزنَّان
... وما بانت لا خزامى، لا شجرة اللوز ولا حوض الرَّيحان...
خطوط عَينيها بانو، مَرْوَد عينيها نْشَف وزْواق
حنَّتها نِسْيان
رجليها تفلْحات ويَديها نشفات، حروف زينها تَنْسات
لَوْحَم بْحال لحْصاد جا في وقتو؛ يشاركها غدَّة
لفراق وكِيْتو...
"الله يرزقني بْنِية تقرا ليا، تشوف من جّاج وتعيش هْنِية"
فاطمة كليين
0 التعليقات :
إرسال تعليق